مفتی صاحب رحمہ اللہ نے بنیادی دینی تعلیمات مقامی علماء ِ کرام سے حاصل کی تھی اور باقاعدہ حصولِ علم کے لئے گلاپور(غذر گلگت بلتستان )کے معروف عالم ِ دین حضرت مولانا اکبر گل رحمہ اللہ (جو فاضل دیوبند تھے اوردیوبندی مولاناکے نام سے معروف تھے) کی سرپرستی میں قریباًسن 1958ء میں گلگت سے کراچی کا سفر کیا۔ دارالعلوم کراچی میں درجہ اولیٰ تا سادسہ تک علوم دینیہ کی تعلیم حاصل کی ۔ اس وقت دارالعلوم کراچی کے سرپرست اور چیدہ چیدہ اساتذہء کرام یہ تھے:
 حضرت مولانا مفتی محمد شفیع رحمہ اللہ ، مفتی اعظم پاکستان (سرپرست ومربی)
 حضرت مولانا مفتی رشید احمد لدھیانوی رحمہ اللہ۔
 حضرت مولانا اکبر علی رحمہ اللہ۔
 حضرت مولانا سحبان محمود رحمہ اللہ۔
 حضرت مولانا شمس الحق صاحب رحمہ اللہ (جامعہ اشرفیہ کے حضرت مولانا محمد یعقوب رحمہ اللہ کے ہم سبق تھے)۔
 حضرت مولانا سلیم اللہ خان رحمہ اللہ ( صدر وفاق المدارس العربیہ و مہتمم جامعہ فاروقیہ کراچی)۔
 حضرت مولانا خورشید عالم رحمہ اللہ (سابق شیخ الحدیث،صدر مفتی و نائب مہتمم دارالعلوم وقف دیوبند جو شیخ الاسلام حضرت مولانا مفتی تقی عثمانی صاحب مدظلّہ کے چچا زاد بھائی تھے)۔
 قاری رعایت اللہ رحمہ اللہ (دارالعلوم دیوبند کے فارغ التحصیل تھے۔ حضرت مولانا مفتی محمد شفیع صاحب رحمہ اللہ کی وفات کے بعد دارالعلوم کراچی کے سرپرست مقرر ہوئے)۔
 حضرت مولانا عبد الحق رحمہ اللہ۔
چھے سال علوم دینیہ کی تکمیل کے بعد سن 1964ء میں علوم آلیہ فنون کی تکمیل کے لیے حضرت مولانا عبد الحق رحمہ اللہ کے مشورہ اور حضرت مولانا مفتی رشید احمد لدھیانوی رحمہ اللہ کےمشورہ سے جامعہ قاسم العلوم ملتان (پنجاب) میں داخلہ لیااورایک سال مکمل فنون کی کتابیں پڑھیں۔غالباً اسی زمانے میں حضرت مولانا مفتی محمود رحمہ اللہ کا اس مدرسہ میں بطور شیخ الحدیث تقرر ہوا تھا۔ دیگر اساتذہ کرام یہ ہیں :
 حضرت مولانا محمد شفیع رحمہ اللہ ( قاسم العلوم کے مہتمم تھے)
 حضرت مولانا محمد موسیٰ خان روحانی البازی رحمہ اللہ ( بعد میں جامعہ اشرفیہ لاہور تشریف لے آئے )
 حضرت مولانا عبد القادر رحمہ اللہ
 حضرت مولانا محمد عظیم رحمہ اللہ
حضرت مولانا محمد عظیم رحمہ اللہ سے قاضی مبارک، حمداللہ ، عبدالغفور اور شرح جامی وغیرہ دوبارہ پڑھی۔اور حضرت مولانا محمدموسی خان روحانی البازی رحمہ اللہ سے وہیں دورہء مختصرالمعانی، شرح عقائد اور تصریح (فلسفہ) پڑھا۔ دورانِ تعلیم پنجاب میں شیخ التفسیر و حافظ الحدیث حضرت مولانا عبد اللہ درخواستی صاحب رحمہ اللہ سے دورہ ءتفسیر بھی پڑھنے کی سعادت بھی حاصل کی ۔
موقوف علیہ اور دورہ حدیث شریف کے لیے سن 1965ء تا 1966ء لاہور کی مایہ ناز علمی درسگاہ جامعہ اشرفیہ لاہور میں تعلیم حاصل کی۔ اور بزرگ اساتذہء کرام نے اس رائے کے ساتھ سند سے نوازا کہ "جید الفھم اھل للافادۃ والتدریس” ہیں۔ اس دوران جامعہ اشرفیہ لاہور کے معروف اساتذہ کرام مندرجہ ذیل تھے:
 حضرت مولانا محمدرسول خان ہزاروی رحمہ اللہ (مدرس ترمذی شریف)
 حضرت مولانا محمد ادریس کاندھلوی رحمہ اللہ (مدرس بخاری شریف )
 حضرت مولانا مفتی جمیل احمد تھانوی رحمہ اللہ
 حضرت مولانا عبیداللہ رحمہ اللہ (مہتمم جامعہ اشرفیہ لاہور)
 حضرت مولانا غلام مصطفیٰ رحمہ اللہ
 حضرت مولانا عبد الرحمٰن اشرفی رحمہ اللہ
 حضرت مولانا محمد یعقوب رحمہ اللہ
جامعہ اشرفیہ لاہور سے تکمیل وفراغت کے بعد دوبارہ کراچی تشریف لے گئے۔ سن 1967ء میں دارالافتاء والارشادناظم آباد کراچی سے تخصص فی الافتاء کیا۔یہ درسگاہِ رشدو ہدایت حضرت مولانا مفتی رشید احمد لدھیانوی رحمہ اللہ کے زیر سایہ افتاء و ارشاد کا مرکز تھی ۔حضرت مفتی صاحب رحمہ اللہ بذاتِ خود اسباق پڑھایا کرتےتھے اور ان کا مرتب کردہ افتاء وارشاد کا ایک سالہ نصاب ہو ا کرتا تھا۔